პირველი ივლისიდან, მოგზაურები ვენეციას, სპეციალური ელექტრონული საშვის გარეშე ვეღარ მოინახულებენ. Forbes-ის მიერ გავრცელებული ინფორმაციის თანახმად, ვენეციაში ტურისტების რეგისტრაციის სისტემა ამოქმედდება.
ვენეციის ხელისუფლებამ ტურისტების ნაკადის რეგულირებისა და ქალაქში ფასიანი შესვლის იდეა ჯერ კიდევ 2019 წელს გაახმიანა. საბოლოოდ გადაწყვეტილება აღდგომის შემდგომ მიიღეს, მას შემდეგ რაც ქალაქს სამი დღის განმავლობაში, ნახევარი მილიონი ადამიანი ეწვია. აღნიშნულმა ფაქტმა, ადგილობრივ მოსახლეობას გარკვეული პრობლემები შეუქმნა.
თავდაპირველად სისტემა ექსპერიმენტულ ფორმატში იმუშავებს. წინასწარ განსაზღვრულ ონლაინ პლატფორმაზე ან მობილურ აპლიკაციაში, უფასო რეგისტრაციის შემდეგ, ტურისტი ვენეციის მოსანახულებლად სპეციალურ QR კოდს მიიღებს.
2023 წლისთვის, ხელისუფლება ვენეციაში შესვლისთვის გადასახადის დაწესებას გეგმავს. ღირებულება განსხვავებული იქნება სეზონების და კვირის დღეების მიხედვით, 3-დან 10 ევრომდე. გადასახადისგან თავისუფლდება ის ტურისტი, რომელიც ვენეციაში ღამის გათენებას, რომელიმე სასტუმროში გეგმავს. ამბობენ, რომ ტურისტების წახალისებას, ხელისუფლება მუზეუმებსა და რესტორნებში, ფასდაკლებებით გეგმავს.